(Şuşa, 18 sentyabr, 2021) – Bu gün ilk dəfə Milli Musiqi günü Şuşada keçirilib. Tədbirdə iştirak edən nümayəndə heyəti ilk olaraq xalq artisti Bülbülün evini və Natəvan bulağını ziyarət ediblər, tanınmış Şuşalılar Xurşudbanu Natəvan, Üzeyir Hacıbəyov və Bülbülün heykəlləri önünə gül dəstələri qoyublar.

Hər il dahi Üzeyir Hacıbəyovun ad günündə qeyd olunan tədbir, bu dəfə Maestronun heykəlinin ucaldığı parkda baş tutub. Tədbiri giriş sözü ilə açan Prezidentin Şuşa rayonunda xüsusi nümayəndəsi Aydın Kərimov bildirib ki, 1995-ci ildən Ulu Öndər Heydər Əliyevin fərmanına əsasən keçirilən Milli Musiqi Günü bu il Azərbaycan Prezidenti, Silahlı Qüvvələrin Ali Baş Komandanı İlham Əliyevin dəmir iradəsi və  Müzəffər ordumuzun rəşadəti sayəsində Şuşada keçirilir: “Bu gün keçirilən tədbirin xüsusi əhəmiyyəti var.

Milli Musiqi Günümüz vaxtı ilə erməni vandallarının dağıtdığı və 29 avqust tarixində cənab Prezident tərəfindən açılış etdiyi Üzeyir bəyin heykəli qarşısında keçirilir. İkinci səciyyəvi məqam odur ki, bu gün qarşımızda çıxış edəcək Fikrət Əmirov adına Mahnı və Rəqs ansamblı düz 85 il əvvəl Maestro tərəfindən yaradılıb”.

Mədəniyyət nazirinin 1-ci müavini Vaqif Əliyev bildirib ki, bu günki tarixi tədbirdə yalnız Üzeyir bəyin vaxtı ilə yaratdığı ansambl deyil, həmçinin ölkənin aparıcı sənətkarları, xalq və əməkdar artistləri, tanınmış ifaçılar iştirak edir, onun adını daşıyan parkda milli musiqimizin xəzinəsi sayılan əsərləri ifa edirlər. Nazir müavini Şuşanın mədəniyyət paytaxtı olaraq bundan sonra da bir çox yerli və xarici tədbirlərə ev sahibliyini edəcəyini bildirdi.    

Xalq artisti Polad Bülbüloğlu Şuşaya yeni həyatın qayıtdığını bildirdi. O, Vaqifin Poeziya Günlərinin keçirilməsi, Xarı Bülbül festivalı, tarixi və mədəni abidələrin bərpa edilməsini və bu gün Üzeyir bəyin ad günündə qeyd olunan Milli Musiqi Gününün keçirilməsini xüsusi vurğuladı. Səfir Bülbüloğlu Şuşanın ölkənin mədəniyyət paytaxtı adına tam layiq tədbirlər keçirdiyini qeyd etdi.     

Daha sonra Fikrət Əmirov adına Mahnı və Rəqs ansamblının Xalq Çalğı Alətləri Orkestri ifasında Üzeyir Hacıbəyov, Vasif Adıgözəlov, Suleyman Ələsgərov və digər bəstəkarların ifaları səsləndirildi. Xalq artisti Mənsur İbrahimov, əməkdar artistlər Qocaq Əsgərov, Anar Şuşalı, Nərgiz Kərimova, Arzu Əliyeva və digər ifaçılar milli musiqi sənətimizin rəngarəngsiz nümunələrini canlı təqdim etdilər.